САК БУЛ: ИНФЕКЦИЯ!

Каникуллар ял өчен бирелсә дә, бер саксыз адымның бөтен ялны бозып куюы бар. Шуңа ял вакытында сәламәтлегең турында ныклабрак кайгырт! Җәй көне еш очрый торган эчәк инфекциясеннән ничек сакланырга кирәклеге турында беләсезме?

Җәй – иммун системасын ныгыту өчен менә дигән вакыт. Сезонлы яшелчә, җиләк-җимеш, яшелчәнең пәйда булуы моңа менә дигән сәбәп. Ләкин шушы ук чорда кеше организмы эчәк инфекциясен тиз йоктыра ала.

Яшьләр бу авыруга тизрәк бирешә. Шуңа бу инфекцияне йоктырмас өчен, ялда берничә кагыйдәне истә тотарга кирәк:

​ ашар алдыннан һәрвакыт кулларны яхшылап сабын белән юарга;

​ су кергәннән һәм кеше күп җыелган урыннарда булганнан соң да кул юу кирәк;

​ экзотик продуктларны һәм җитештерү урыны билегесез булган ризыкларны ашамау хәерле (чөнки ашказанына таныш булмаган ризык ашказаны согының кислоталылыгын киметә. Ә ул, үз чиратында, организмны саклый);

​ көн дәвамында еш чиста су эчәргә кирәк;

​ пляжда, урамдау, шикле урыннарда ризык сатып алмаска тырыш.

Шушы кагыйдәләрне үтәү бөтен гаиләне бу авырудан саклап калачак.

Эчәк инфекциясенең берәр билгесе барлыкка килгәндә дә,
кичекмәстән табибка мөрәҗәгать итәргә кирәк.