Татарстанның инвестицион эшчәнлегенә багышланган YouTube-канал эшли

Фото: скриншот

Татарстанның инвестицион үсеш агентлыгы республикабызда яшәүчеләрне яңа YouTube-каналга язылырга чакыра. Бу канал Татарстанның инвестицион эшчәнлегенә багышланачак.

Әлеге каналны табу өчен YouTube порталында “investtatarstan” дип эзләргә һәм язылырга кирәк, шуннан соң сезгә киләсе эфирларга һәм яңа роликларны карарга чакыру килеп барачак.

Әлеге ресурста Татарстанның инвестицион үсеш агентлыгы тарафыннан уздырылган чаралардан, шул исәптән ел саен уздырыла торган «Россия – Исламский мир: KazanSummit» Халыкара икътисади саммиттан видеолар, Татарстан Республикасының Инвесторлар Клубының утырышлары, дөньяның алдынгы конгресс-күргәзмә чараларында Татарстан стендының эшчәнлеге турында эксклюзив видеолар урнаштырылып бара. Шулай ук канал Татарстанның инвестицион эшчәнлеге вәкилләренең, шул исәптән, махсус икътисади зоналар, алдынгы иҗтимагый-икътисади үсеш территорияләре, сәнәгать парклары һәм мәйданчыклары вәкилләренең видеороликларын, республиканың иҗтимагый-икътисади үсеше турында сөйләүче роликларны туплый торган урын булачак. Әлеге видеоларны берничә телдә, шул исәптән рус, инглиз, төрек, француз, алман, кытай, япон һәм гарәп телләрендә карарга мөмкин.