Татарстанның яшь чаңгычылары өченче урын яулады

Татарстан чаңгычылары – 17-18 яшьлек егет-кызлар Идел буе федераль округы беренчелегендә гомумкоманда исәбендә өченче урынга күтәрелде. Чаңгы ярышлары 29 гыйнвар-3 февраль көннәрендә Ижевскида узды.

“Беренчелек ярыш төрләренә бик бай иде, – дип хәбәр иттеләр Чаңгы ярышлары һәм биатлон федерациясе матбугат хезмәтеннән. – Яшь чаңгычылар классик ысул белән – спринт һәм 5, 10 чакрымга, ә ирекле стильдә 10 һәм 15 чакрым арага узышты. Моннан тыш эстафетада иң көчле командалар ачыкланды”.

Ярышларның соңгы көнендә чаңгычы кызлар – Динара Хәйруллина, Диана Маслова, Зөлфия Хәбибрахманова һәм Дарья Зубареваның эстафетадагы “алтын”ы Татарстан командасын гомум беренчелектә 3нче урынга күтәрде. Беренче урында – Удмуртия, икенчедә Пермь командасы.

Шунысын да әйтергә кирәк: Идел буе федераль округы беренчелеге Бөтенроссия ярышларына сайлап алу этабы да булып торды.