«Җиңелүләр дә җиңүгә илтә ала» – Туфан Миңнуллин исемендәге V Республика конференциясе узды

Бүген Казан шәһәре Мәскәү районының Фатиха Аитова исемендәге 12нче татар кызлар гимназиясендә Туфан Миңнуллин исемендәге V Республика конференциясе булып узды.

Конференциягә «Журналистика. «Кызыл тышлы дәфтәрдән» һәм «Т. Миңнуллин иҗаты буенча фәнни эшләр» номинацияләрендә үз көчләрен сынарга дип Татарстанның төрле районнарыннан егет-кызлар җыелган иде. Апас районы Каратун урта мәктәбенең 7нче сыйныф укучысы Җаппарова Энҗе конференциягә кунаклар да алып килгән иде, хәтта. Көрәш буенча спорт остасы, Татарстан, Россия чемпионы, Дөнья кубогы иясе – Булат Мусин, конференциягә килеп, Энҗенең сорауларына җавап бирде, Туфан аганың «Җиңелүләр дә җиңүгә илтә ала» дигән юллары турында фикерләре белән бүлеште.

Конференциянең күренекле драматург, язучы, җәмәгать эшлеклесе Туфан ага Миңнуллинга багышлап уздырылуы да юкка түгел. 2001 елда, Туфан Миңнуллин тырышлыгы белән, гимназия барлык уңайлыклары булган яңа бинага күчерелә. Бүген гимназия, үз укучыларын гына түгел, читтән килгән сәләтле балаларны да төрле чара-бәйгеләр белән куандырып тора.