СӘЛКЕШ КӨНДӘЛЕГЕ: «СӘЛӘТ»ТӘ ЯҢГЫР ГАЛӘМӘТЕ

2 көн. 

«Сәләт»тә көннәр турбо режимда үтә! Моңа мин бүген инандым… Иртә белән чират тормас өчен 5тә торып юыну яхшырак икән. Шәхсән шулай иттем дә инде. Аннары иртәнге зарядка һәм туклыклы иртәнге аш. Ашауга килгәндә, монда 4 тапкыр тәмле итеп ашаталар. Кыскасы, төннәрен эчләрдә бүреләр уламый.

Дәресләр дә нәкъ менә бүген башланып китте. Кем нинди юнәлешкә барасы килә – сайлау мөмкинлеге зур! Рәхәтләнеп яңа мәгълүмат ал һәм тәҗрибә тупла гына.

Яңгыр болытлары да кунакта булдылар «Сәләт»тә. Сәлкешләрне бераз юып, чылатып алу мөмкинлеген кулдан ычкындырмадылар алар…

Спорт һәм интеллектуаль уеннар әлеге, икенче көндә дулкынландыргыч мизгелләр һәм юеш палаткалар белән истә калды… Нишләтәсең бит, табигать сәлкеш түгел. «Ярамый, тукта», – дип калып булмый!

Касыймова Илүзә